Metung Libung Riteñans ding Misaupan king 2023 Humanitarian Mission

Abut abut king metung libung Riteñans ding misaupan king 2023 Humanitarian Mission a meganap ngening Lunis, February 20, 2023 king Municipal Covered Court.

Keni mekapagpacheck-up la ding kekatamung kabalen, mekapagpaprisyun, mekapagpalawe mata, midinan lang panulu at mika libreng konsultasyun kareng miyayaliwa dang pamangailangang medikal.

Mangatwa man o anak, eda pelampasan ing pamikatagun a makapagpacheck-up.

Penimunan ne ning Metropolitan Humanitarian Foundation, Inc. ing proyektu a pamuntukan ng Cal Coleman kayantabe ing founder a y Dr. Leopoldo SIcat at ding aliwa pang Executive Council Volunteers. Buu mu naman ing suportang pepakit ng Mayor Art Salalila. king misyun lalu pa’t maulaga ya iti king kalusugan da reng kayang sasakupan.

Bukud king libreng medical, optical at dental check-up, pepaganaka mu rin kareng tau ing ulaga ning exercise, ustung pamamangan bang akwa ing masanting a pamangatawan.

Mig-umpisa yang alas nuebi ning abak ing aktibidad at mayari yang alas dos ning gatpanapun.