Resolusyun para king katuparan ning HemoDialysis Center Santa Rita

Kasabe ning Session ning 10th Sangguniang Bayan ning balen Santa Rita, mipasa ne ing Municipal Resolution No. 8-2023 anyang January 30, 2023.

 

Kapamilatan ning Resolusyun a inisponsoran ng Councilor at pamuntuk ning Committee on Health a y Alvin P. Martin, didinan deng autoridad ing LCE o ing Local Chief Executive a y Mayor Art Salalila bang lungub king metung a Memorandum of Agreement king Hemant Medical Supplies Phil., para king operasyun ning Hemodialysis Center king Brgy. Becuran.

 

Basi king General Welfare clause ning Section 16 ning Republic Act 7160 o ing Local Government Code of 1991, mandatu ning balang lokal a gubyernu na isulung ing masanting a pamikakatawan o public health at safety da reng kayang sasakupan. Dagdag pa keti ing pamanyiguradu king kaligtasan da reng tau at pamagpanatili king karelang kaligtasan at masaleseng kabyayan da reng anggang Riteñans.

 

Makalage ya naman king Resolusyun ing layun ning lgu ning balen Santa Rita na samasan at mas palawakan ing sakup niting Health Care services and programs kareng anggang Riteñans. Abe keti ing mipaltutu ing pamag operate ning Hemodialysis Center bilang metung kareng priority projects ning kasalukuyang administrasyun.

 

Dagdag pa keti, ing kumpanyang Hemant Medical Supplies Philippines, Inc. a mag-specialize king pamag-operate Hemodialysis Center at aliwa pang Healthcare facilities mabilug a bansa.

 

Ing mesabing kumpanya mu naman ing magsilbing dalan bang asaupan la ding anggang pasyenting mag dialysis nung nukarin alayang gastusan ing lokal a gubyernu.

 

Uling ala yang sapat a pondu ing Munisipyu bang makasaling sariling Dialysis Machines at mag-operate Dialysis Center, meging parti ne ning PPP o Public-Private Partnership ing proyektu. Iti ing paralan bang ali ya kabud mitengga ing mitalakad a building nune magamit para king kapakanan da reng anggang Riteñans.

 

Dagdag pa keti, mikadagdag panakitan ya ing Munisipyu para kareng aliwa na pang proyektu at programa. Bukud kaniti, mapilan ka reng kekatamung kabalen dig mapili na magobra king Dialysis Center. Ing peka importanti kaniti, enala kailangang lumawut pa ding kabalen tamung mag-dialysis king balen Santa Rita.

 

Ngening Huwebis naman, February 16, 2023 meganap ya ing MOA Signing pilatan ning LGU at Hemant Medical Supplies Phil.