UPDATE KING DIALYSIS CENTER KING BALEN SANTA RITA

UPDATE KING DIALYSIS CENTER KING BALEN SANTA RITA
January 13 anyang sumulat ya ing opisina ng Mayor Art Salalila king Sangguniang Bayan bang pagtibayan kapamilatan ning Resolusyun ing pamamye autoridad king Mayor a lungub Contract of Lease king Hemant Medical Supplies Inc. kambe da reng anggang tau Santa Rita bang mag-umpisa ya ing operasyun ning Dialysis Center Building king Brgy. Becuran.
Meturingan ya iting Urgent Executive Agenda lalu pa’t layun ng isulung ing Public health and safety da reng kekatamung kabalen.
Nung miapruban, ing Dialysis Center Building a makatalakad king Brgy. Becuran magamit ne hanggang labinlimang banwa at malyari yapang maextend.
January 19, 2023 inadopt ne ning Sangguniang Bayan ing Resolusyun bang dinan yang autoridad ing Mayor a lungub king Memorandum of Agreement o MOA king Hemant Medical Supplies Phil., bang magamit ne ing dialysis center.
King regular session da reng SB Members anyang January 30, 2023 telakayan de ing resolusyun. Meging makaba at madetalyi ing diskusyun.
Limang konsehal la ding migpabor king Resolusyun. Deni dina Councilors Reynan Calo, JR Salalila, Kim Cosme, Alvin Martin at Alex Cruz.
Ding lima naman, ede peboran ing Resolusyun. Deni dina Councilors Rico Sta Cruz, Nat Gopez, Roy Galang, SK Federation President Eimrel Kong at LnB President Jay Cruz.
Uling parehung tsa lima ding botu kinailangan ng mag break tie Vice Mayor Mercy Carreon. Metung ya iti kareng obligasyun ning Bisi Alkaldi a makabatas. Uling maniwala ya iting makasawup ya ini para king kapakanan da reng Riteñans, binotu ya ing babaing lider pabor king Resolusyun.
Uliniti, menaig ya ing Tune Lugud at Malasakit kareng Riteñans king botung 6-5.
King session ning Sangguniang Bayan, meapruban ne ing Resolusyun bang lungub ya king MOA ing Munisipyu lalam ning lideratu ng Mayor Art Salalila king Hemant Medical Supplies Phil. Senyalis ya iti na malapit neng ma set-up ing Hemodialysis Center king balen Sta. Rita.
💛💙❤️